,. , الــقدس ,.,
تخيلوا لو يفزع الجار للجار
في مجتمع غاضب وحاقد ومشحون
وتخيلوا لو تلتفت كل الانظار
للمشهد اللي وقفت دونه عيون
وتخيلوا لما رحل الحرب تندار
مابين حكام العروبه وصهيون
اليا متى نستقبل ذنوب بأعذار
واليا متى نستنزف جروح بطعون
نتبع خطأ تيار ونصد تيار
نبعد وعدوان المسلمين يدنون
لوكان بقلوب العرب صبر واصرار
ماكان سووا فيكم اللي يسوون
بهمالكم بدلتم الثار بالعار
بعتم تراب القدس وانتم تشوفون
حنا كذا بمعارض الراي شطار
لين أستوى بالمجد عالي ومطمون
من كثر ما كنا نجامل ونحتار
صرنا نخاف نعارض اللي يقولون
لقدس تصرخ والسما تحصد أعمار
والدم ينزف والارامل يموتون
وارواح تسلب سلب واعصاب تنهار
واطفال تعدم والبشر ما يحسون
خمسين عام نحارب الشرك بأحجار
وبسكوتنا نبني عمارات وحصون
ننسى وكن اللي حصل شي ماصار
نسكت وكن مابيننا شخص مغبون
لين أشربوا من دم الاسلام كفار
وبعروقنا صاروا يروحون ويجون
استضعفوا لين اضعفوا كل الاقطار
ساقوا غضبهم والاوادم يصلون
يستدرجون العزل للسمح الابرار
يستمتعون بقل الاطفال بالهون
ماكنه الاشعب مخلوق غدار
في قلب لا ساكن ولاهو بمسكون
بالذل ماتلقى على صيته غبار
كبارهم واطين وصغارهم دون
لابارك الله فيهم صغار وكبار
ولاجمع الله شملهم وين يسعون
وماتنطفي شمس الحقيقه ولو جار
فينا زمان الذل والضعف والهون
ودام الفشل والضعف ثلثين الاضرار
لابد ما نضحك ولا بد يبكون
وأنكانت قلوب العرب تنذر انذار
ليش انتجاهلهم واهم يستبدون
الناس قالت حارب النار بالنار
ومالله خلق للادمي عمر مضمون
وان كانت الفزعه من أحرار لأحرار
حنا البروق اللي غدت سحب ومزون
وحنا السكون اللي سبق عصف واعصار
وحنا سباع الكون يا لعنة الكون
وحنا عرب والعرب ماتترك الثار
بافعالنا ماهي بقولة يقولون
نزعل ولكن بالزعل دمنا حار
نفزع اليا شفنا العذارى يصيحون
عقالنا معهم من العلم مقدار
ومجنوننا ينطح ثمانين مجنون
ياشعب يا ثاير وياشعب مغوار
هون من اسباب المعاناه وتهون
أصرخ على كل البشر وأجهر أجهار
وخل اليهود إن مادروا عنك يدرون
وأجمع شتات الوقت تذكار تذكار
وأذكر مواقف كل طاعن ومطعون
حارب بدين الخالق النافع الضار
واستذكر الرحمن وابليس ملعون
واطرد من ارض الله عدوين الاذكار
وان جوك ولا جعلهم مايردون
ورح قلهم حنا على كل مشوار
وذوقوا مرارة نصف ما تستحقون
واذا رضيتم قولوا الوقت دوار
يوم دارت في جنون من جنون الجاهليه,,,,
عاتبتني لين شبت في شراييني لهبها
استفزتني وفزت وزعلت مني عليا,,,,,,
واستضاقت من كلامي يوم زعلني عتبها
من بعدها مابقى لي في محانيها بقيه,,,
اسدلت دمع المحاجرللبكا وارخت هدبها
والله اني ما نويت ابدي معاها بالخطيه,,,
بس هي اللي تعدت حدها لحظة غضبها
والله اني كنت اكابر بالعتاب بحسن نيه,,
بس بدري هو صحيح اني الوحيد اللي عجبها
يمكن اني كنت قاسي بالعتب معها شويه,,,
كثر ما كانت تمنى راحتي واعشق تعبها
جرحتني بالكلام وكبرت حيل القضيه,,,,
واخسرت بي كل عرق من شراييني كسبها
والا هي ما كان فيها للموادع مقدريه,,,
والجفا كانت تعافه بس ماادري وش قلبها
ليتني مارحت اقايس قيمتي عند بدويه
رجعت لي كل عرق حبها والا نهبها
علمتني كيف ابجفا وانتصر وابقى ضحيه
وعلمتني كيف قلبي لو غلبها ما غلبها
وعلمتني يوم صدت عنفوان الاجوديه
ما تلوح للمقفي لو سلبها ما سلبها
وابيه بين القبايل والعرب واهل الحميه
عاقله ما تبذر الا نخلة تعرف رطبها
ان تهادت ذكرتني في خفوق العامريه
وان تمادت تركب ابليس الرجيم وما ركبها
جفنها لا سلهمت به ما يطيق السامريه
تسحبه برضله عينه وان سهت عينه سحبها
وان حكت تعطي مكانه للحروف الابجديه
كن كلمتها تلفت للكلام اللي عجبها
والحروف الا تعدت بالشفاه النرجسيه
كنها صارت قصيده بس ربي ما كتبها
وش بوصف من حلاها وش بخلي للبريه
مابها بالحسن عيب واكشفت الا حجبها
شعرها فيه الخوي اللي تبرى من خويه
والشفاة لو تشرب الماء اختلط فيها شربها
وباسفل الشفه حبة الخال وجمرتين ونار حيه
كل من حس بدفاها واحترق صد وقربها
شفتها مثل الجريمه وابتليت بها بليه
غلطة جيت اتحاشى ظلمها قلت ارتكبها
كل شي شفت فيها فيه نبرة جاذبيه
موهبه من فضل ربي واشهد ان الله وهبها
كلها لله وبالله فتنة هالادميه
عاجبتني من بداية راسها لاسفل كعبها
لو تبادلني شعوري والهديه بالهديه
ما وفت لي لو تبيع ثيابها واغلى ذهبها
هملتني والقلوب الجرهديه جرهديه
واحرمتني والمحبه نارها تاكل حطبها
والا انا ماكنت اكابر والليالي سرمديه
يمكن اللي غصبني للولع فيها غصبها
يا خفوقي ادري انك منت بحاجة وصيه
شف مكاني وانت تدري وين هي يمة عربها
رح لها وان كان فيها قلب يطمح في مجيه
شف طلبها في عروقه وان حصل تمم طلبها
وانشده وان قال عنها من هدر دمي بريه
قل لها ان اللي حصل لي في المحبه من سببها
لو يقول اني تعمدت الخطا لاجل الاذيه
قل انه ماتحمل بالعتب قله ادبها
ولو يقول اني انا اللي كنت بادي بالخطيه
قل هي اللي تعدت حدها لحظة غضبها
يسلموو على الجزء الثاني من اشعار حامد 